A NAVALLA DE BOTIS - Fascículo 2: Sesgo do supervivinte

Da II Guerra Mundial á carreira da túa vila.
Aquí quero falar, como sabes, de saúde e rendemento no deporte e antes de profundizar quero contarche por que creo que debes saber como e pra que facer as cousas. O caso é que o outro día navegando sen rumbo pola rede topeime cunha publicación que falaba sobre o sesgo de supervivencia e as tácticas da aviación aliada na II Guerra Mundial e pareceume que podía valer pra explicar o que che quero dicir, así que como dixo Jack o Destripador: imos por partes.

1. Como che vou falar sobre o “sesgo de supervivencia” imos ver qué significa iso de “sesgo”. Moi rápido: en psicoloxía emprégase o concepto de “sesgo cognitivo” pra definir unha serie de mecanismos que a nosa mente usa pra darmos resposta rápida a un problema filtrando a información dispoñible de xeito subxectivo. Na nosa guía rápida podemos substituílo aquí por prexuízo (algo así), sigamos...

2. Os sesgos cognitivos son a parte da nosa evolución natural e consecuencia da mesma que nos levou a sobrevivir ata os nosos días. Podémola definir como técnica pra atopar solucións rápidas mediante regras empíricas ou o método proba-erro. Isto é: o homo sapiens que vía un tigre botaba a correr sen agardar a ver se tiña fame, nos nosos días se escoitamos a bocina dun coche igual nos botamos a un lado.

3. Este xeito de atopar solucións de maneira rápida é responsable en parte da nosa supervivencia e evolución pero nos pode levar en ocasións a solucións erróneas.

Vou agora pola parte na que se pode relacionar co noso deporte, e poida que con outros. É moi doado nas categorías populares de deportes de fondo atopar “referentes” nun determinado territorio, entendendo como tal a deportistas cunha certa facilidade de obter bos resultados nas probas ás que acuden. É moi doado tamén observar como unha parte importante dos seus competidores, rivais, amigos ou compañeiros de grupeta tratan de emular os seus comportamentos e imitar os seus adestramentos e costumes como un mantra que os ha de levar polo camiño do éxito. Así, abofé que tes escoitado frases do tipo: “fixo tal media nun entreno”, “sempre vai con fulano ou mengano”, “toma tal ou cual suplemento” e outros moitos.

A cuestión é que cando te fixas en certas persoas como figuras exemplos a seguir polo seu bo facer baseándote nos seus resultados deportivos é moi doado que esteas a caer nun destes sesgos cognitivos.

Imos agora co exemplo do que trae causa este artigo: o sesgo de supervivencia e as técnicas da aviación aliada na II Guerra Mundial. A artillería nazi facía estragos nas aeronaves aliadas en cada expedición e tomouse a decisión de tratar de mellorar a resistencia ó fogo inimigo analizando os danos causados polos proxectís.

Puro Ciclismo, purociclismo, blog, ciclismo, giro, tour, vuelta, clasicas, bici, bicicletas, noticias, entrevistas, ciclocross, mtb, btt, cx, pista
Foto: Cedida por Botis

Logo de estudar numerosas naves que viñan de sufrir ataques por parte da artillería nazi sobre a mesa dos enxeñeiros aliados apareceu un esquema extremadamente claro de ónde estaban a sufrir danos as naves que regresaban ó hangar logo de ser atacadas. A resposta ó problema estaba clara: reforzando esas zonas suficientemente as naves analizadas non terían sufrido danos durante os ataques da artillería inimiga.

Puro Ciclismo, purociclismo, blog, ciclismo, giro, tour, vuelta, clasicas, bici, bicicletas, noticias, entrevistas, ciclocross, mtb, btt, cx, pista
Foto: Cedida por Botis

Foi o matemático Abraham Wald o primeiro en caer na conta de que esa análise feita cos danos sufridos polas aeronaves aliadas só incluía ós avións que foran quen de chegar de volta á súa base, dato este que fixo mudar 180º a visión dos enxeñeiros pra buscar posibles solucións ó problema.

Atopas tí unha relación entre este sesgo de supervivencia e o feito de tratar de emular a un deportista popular polo mero feito de que teña certo éxito nas súas competicións?

Por exemplo: se collemos un grupo de deportistas e os poñemos a facer unha hora ó seu máximo todos os días pode ser que haxa algún que mellore, pero así contado non se che ocorre intentalo, non sí?

É por isto que creo importante que teñas unha guía básica sobre como facer as cousas se pretendes poñerte a adestrar, e non deixarte caer en mans de youtubers vendedores de crece pelo e "fendeculatas" varios.

PD.: á mesma conclusión podemos chegar pretendendo emular deportistas elite ou profesionais, pero por outros camiños. Podemos falar disto noutra ocasión.

Lémonos aquí e saudamonos na estrada.

Podes atoparme en:
- Strava: Botis
- Facebook: TB Botis
- Instragram: jbtorrado

Podes contactarme en:
- jb.torrado@gmail.com

Podes unirte a:
- Non plus flipare (grupo en Strava)

Publicar un comentario

0 Comentarios